2025-ci il “Kyokensei- Gənc müəllimlər üçün təlim” Yaponiya Dövlət Təqaüd Proqramına sənəd qəbulu başlamışdır (Yaponiyada təhsilin başlanması: 2025-ci il, sentyabr-oktyabr ayları)

2025-ci ildə Yaponiyada təhsilin başlayacağı “Kyokensei-Gənc müəllimlər üçün təlim” (qısaca, “Kyokensei”) proqramına sənəd qəbulu başlanmışdır. Proqrama müraciət üçün son tarix 24 fevral (bazar ertəsi) olaraq təyin olunmuşdur. Qeyd olunan tarixədək müraciətlərinizi gözləyirik!
 

1. “Kyokensei” proqramı haqqında məlumat

“Kyokensei” hal-hazırda Azərbaycanın ibtidai və ya orta təhsil müəssisələrində (məktəblərdə) çalışan 35 yaşadək olan gənc müəllimlər üçün nəzərdə tutulmuş, Yaponiyanın müəllimlərin yetişdirilməsi institutlarının təlimlərində iştirak etmək şansı təqdim edən magistr pilləsi proqramıdır. Qalib şəxslər Yaponiyaya getdikdən sonra ehtiyac olduğu təqdirdə, 6 ay müddətində yapon dili üzrə hazırlıq təhsili alıb universitet tərəfindən təqdim olunacaq 1 illik təlim proqramında təlim- tədris prosesi və təhsillə bağlı sahədə dərslərdə iştirak edə bilərlər.
 
Müraciətçilər bu şərtlərə cavab verməlidir:

• 2 aprel 1990-ci il tarixindən sonra anadan olmuş şəxslər
• Universitet və yaxud müəllimlər üçün nəzərdə tutulmuş təlim məktəbini bitirib, 2025-ci il 1 oktyabr tarixinə qədər yaşadığı ölkənin ümumtəhsil müəssisələrində 5 ildən artıq müəllimlik təcrübəsinə malik olan şəxslər. Qeyd: Universitet müəllimi kimi fəaliyyət göstərən şəxslər bu proqrama müraciət edə bilməz.

 

2. Müraciət üsulu

Müraciət etmək istəyən şəxslər aşağıdakı ardıcıllıqla 24 fevral tarixinədək proqrama müraciət edə bilərlər.
 

• Addım 1

Bu səhifədən daxil olaraq “2025-ci il “Kyokensei” Yaponiya Dövlət Təqaüd Proqramına müraciət qaydaları” sənədini diqqətlə oxumaq:
Yapon dilində qaydalar
İngilis dilində qaydalar  
 

• Addım 2

Proqram haqqında tərtib etdiyimiz “Tez-tez soruşulan suallar” (Azərbaycan dilində) hissəsinə nəzər salmaq.

• Addım 3

“Universitetlərin kataloqu” 「コースガイド」 sənədlərinə diqqətlə nəzər salaraq təhsil almaq istədiyiniz universiteti və proqramı seçməyiniz gərəkdir.

⇒ Kataloq Mündəricat (yapon dilində)
⇒ Kataloq 1 (yapon dilində)
⇒ Kataloq 2 (yapon dilində)
⇒ Kataloq Mündəricat (ingilis dilində)
⇒ Kataloq 1 (ingilis dilində)
⇒ Kataloq 2 (ingilis dilində)
 
★ Təklif olunan bütün proqramlar haqqında ətraflı şəkildə oxumağınız və daha sonra özünüzə ən uyğun seçimi etməyiniz xahiş olunur. 
★Universitet və proqram seçimi zamanı təklif olunan proqramın məzmununun sizin seçəcəyiniz ixtisasa, “Müraciət formasının” 20-ci bəndində qeyd edəcəyiniz “Tədqiqat planlarınız”  ilə uyğun olmasına diqqət yetirməyinizi xahiş edirik.
 

• Addım 4

• Bu linklərdən daxil olaraq “Müraciət forması” və “Təhsil almaq istədiyiniz universitetlərə dair Seçim Forması” və “Sağlamlıq haqqında arayış” sənədlərini yükləyib doldurmağınız xahiş olunur.
• Müraciət üçün lazım olan sənədlərin tam siyahısına “Application Guidelines” (募集要項) sənədinin 6-cı səhifəsindən (sənədlərin arasında hazır formatları olan, qeyd olunan linkdən yükləyib doldurmalı olduğunuz, universitet və ya digər qurumlardan əldə etməli olduğunuz sənədlər vardır) nəzər sala bilərsiniz.

 

• Addım 5

 
24 fevral tarixinədək müraciət qaydalarında qeyd olunmuş bütün lazımlı sənədləri PDF formatında səfirliyin culture-info@bk.mofa.go.jp mail ünvanına göndərməyiniz gərəkdir.
 

• Mailin başlığını aşağıdakı şəkildə yazmağınız xahiş olunur:
  Mailin başlığı：MEXT 2025 Kyokensei: Ad və Soyadınız
• Yuxarıda qeyd olunan culture-info@bk.mofa.go.jp mail ünvanına yalnız 10MB-dək ölçüsü olan maillər daxil olur. Odur ki, sənədləri göndərən zaman mailin həcminin 10MB-dan artıq olmamasına nəzər yetirməyiniz gərəkdir. Əgər 10MB-dan çox olarsa, müraciətinizi bir neçə mailə bölərək (maillərin mətnində ad və familiyanızı, Müraciət etdiyiniz proqramın adını və mailin nömrəsini qeyd etmək) göndərməyiniz xahiş olunur.
• Müraciət sənədlərinin orijinallarını itirməməyiniz gərəkdir. Sənəd qəbulu mərhələsindən keçəcək şəxslərin müraciət sənədlərinin orijinal və surətlərini yazılı imtahan zamanı özləri ilə səfirliyə gətirməkləri xahiş olunur.
• Hər hansısa bir səbəbdən “Sağlamlıq haqqında arayış” və ya universitet tərəfindən təqdim olunacaq sənədlərin əldə olunmasında problem yaranarsa, öncədən səfirlik ilə əlaqə saxlamağınız xahiş olunur.

 

• Addım 6

Siz müraciət sənədlərinizi mail ilə göndərdikdən sonra, 2 iş günü ərzində səfirlik tərəfindən “müraciətçi nömrəniz”  qeyd olunan təsdiq maili göndəriləcəkdir. Əgər sizə təsdiq maili gəlməzsə, həftəiçi iş günləri saat 10:00-13:00 aralığında səfirliyin（+99412-4907818）nömrələri ilə əlaqə saxlayaraq məlumat bildirməyiniz xahiş olunur. Zəng etdiyiniz zaman məsul şəxs yerində olmazsa, səfirlik tərəfindən sizinlə daha sonra əlaqə saxlanılacaqdır. Odur ki, zənginiz zamanı “Adınız və əlaqə nömrənizi” mütləq olaraq qeyd etməyinizi xahiş edirik.
 
Qeyd: Sənədlərdə çatışmamazlıq olarsa, müraciətiniz qəbul olunmayacaqdır.

3. Cədvəl

 

2025	Yanvar	24	Sənəd qəbulunun başlanması
	Fevral	24	Sənəd qəbulunun son tarixi
		27	Sənəd seçim mərhələsinin nəticələrinin elanı
	Mart	3	Yazılı imtahan (yapon dili və ingilis dili) MEXT digər proqramları üzrə nümunə imtahan sualları üçün bu linkə nəzər sala bilərsiniz: https://studyinjapan.go.jp/en/planning/scholarship/application/examination/index.html
		4	Yazılı imtahan nəticələrinin elanı
		6	Müsahibə
		7	Müsahibədən müvəffəq olan şəxslərin (1-ci seçim mərhələsindən keçmiş) elanı
	İyunun ortaları		MEXT tərəfindən seçimlər və 2-ci seçim mərhələsindən keçmiş şəxslərin elanı
	İyul-avqust		Yekun qərar və təhsil alacağınız universitetin qərarlaşması
	Sentyabr-oktyabr		Proqram qaliblərinin Yaponiyada təhsillərinin başlanması